疑兇淡定好戲 「我唔係住客」
【本報訊】「好戲」疑兇好鎮定，陪同探員在兇宅外指手畫腳提供資料，又向記者大話連篇及「寸嘴」，「我唔係住客，我陪朋友嚟！我咩都唔知。」姓倪疑兇身形瘦削，但好健碩，雖然一把年紀，但中氣十足兼「演技」逼真，他與另一男住客前晚在現場外助查，表情鎮定若無其事，早上在現場配合探員調查，但就大大聲向記者稱：「我唔喺度住。」他被捕前一直在現場附近士多「打躉」，更被村民笑指：「你咪走啊！村入邊好多閉路電視o架，實影到個疑兇。」疑兇聽罷面色有變沉默不語。
遭踢爆前合作助查
倪姓疑兇被踢爆前，一直態度合作助查，前日傍晚，他與另一名報案的租客留在現場助查，坐在附近逾一小時，期間更翹腳而坐，神情輕鬆，且與探員一直「有傾有講」。至昨午十二時許，疑兇再與租客返回現場助查，逗留約四十五分鐘後才離去，期間神態自若，一直保持鎮定，絲毫不見膽怯，接受本報記者訪問時指：「我咩都唔知，唔係我發現（命案）o架，唔使問我啦，我咩都唔知喎。」更否認自己是租客：「我係呢個住客嘅朋友嚟o架，我唔喺度住o架……我陪人嚟啫，你唔使問啦，我咩都唔知。」
聞有天眼面色一沉
據街坊指，昨午四時許，曾見到疑兇坐在距離兇案現場約八十米外的士多，當時有村民講笑地對他說：「你唔好走呀！」疑兇聞言仍表現淡定，大大聲反駁：「你唔好亂講呀，我冇做過！」村民又稱：「村入面咁多部閉路電視，實影到個兇手啦！」疑兇聞言即時面色一沉，不發一言，悄悄地離開士多。及至晚上，疑兇被帶回現場，村民紛紛表示：「都話o架啦！」