政情：張范元芳堅守116磅廿年唔鬆懈
減肥係女士嘅終身事業，但係隨着年齡增長，淨係想Keep住磅數零增長都好難。家族做西裝訂做生意嘅香港西區婦女福利會永遠名譽會長張范元芳就好有毅力，廿幾年嚟一直守住一百一十六磅關卡，絲毫不鬆懈。
為咗着衫好睇啲
幾時都打扮得高貴得體嘅張太笑言，廿幾年前佢做咗個手術，瞓床休養一段時間，體重就由一百一十二增至一百一十六磅，自此佢就一直以此為戒。佢形容自己好貪靚，保持體重不變係為咗着衫好睇啲。
張太仲話，咪以為一年多一磅好小事，事關小數怕長計。佢有一位女性朋友未嫁前係一百一十八磅，結果後來慢慢肥到一百五十八磅，正正就係一年多一磅，五十幾歲人咪多咗四十磅喺身囉！
聽佢咁講，又幾有道理，但係點做到唔肥呢？
張太話最緊要管住個嘴，食到七分飽就要停口，笑稱唔可以對自己太仁慈喎！佢每個星期亦都會唱京劇練氣當運動。