政情：「失聯」張永森 復活節紮住手現身
深水埗區議會主席張永森上年曾經請病假而冇出席區議會大會，更盛傳一度與外界失去聯絡。尋日張永森出席公開活動，見佢右手受傷紮住咗，而且出入仲要用上拐杖輔助。不過精神就唔錯，轉數仲好快，識得自嘲「潛水好耐」添！
張永森尋日到俗稱「棚仔」嘅欽州街臨時市場出席活動，大會安排佢直接喺台下發言，但張永森堅持上台，佢自嘲過去幾個月潛咗水，所以趁復活節現身。佢更講笑話自己同有三十九年歷史嘅棚仔年紀差唔多，睇嚟佢精神幾好噃！
唔肯透露自己患咩病
張永森唔肯透露身患咩病，只係話右手嘅傷勢係受上年嘅病所影響，因為自己年紀大咁話。佢就話依家要為健康問題長期鬥爭，好彩已經漸有改善，希望佢早日康復喇！