政情：唔去籌款宴心意搭夠 葉劉捐錢公文袋o趙完唱
公民黨（公文袋）喺下個月舉行籌款晚宴，向來建制派對於民主派嘅活動都不甚熱衷，不過原來都有例外。公文袋中人就話，喺特首選舉工程之後曾經話過要成為開明建制派，同泛民主派有偈傾嘅新民黨主席兼立法會議員葉劉淑儀（葉太），就捐咗二千元畀公文袋。有口痕友就話，葉太捐錢可能係為咗回饋公文袋喺佢選特首時同佢會面，亦有人估其實係因為阿爺唔畀葉太「入閘」參選，所以葉太想造反。捐錢仲要畀人o趙完唱，唔知葉太會唔會覺得唔開心呢？
公文袋嘅籌款晚宴除咗邀請政府官員，亦有發帖畀全部立法會議員。向來建制派對於民主派嘅籌款活動都唔太熱衷，但葉太竟然回覆公文袋，話雖然唔出席晚宴，但都會捐款二千元。建制派捐錢畀泛民政黨，真係少有。葉太就話，其實過往個個黨邀請佢出席黨慶、籌款活動等，佢都會捐錢，之前民主黨（白鴿黨）、民建聯黨慶佢都有捐錢，只係小小意思，好似送花籃一樣。而且新民黨黨慶時，泛民政黨都有派人嚟咁話，不過係咪第一次捐畀公文袋，佢就唔記得喇。被問到擔唔擔心捐錢畀反對陣營，會畀人話造反，葉太就話，選舉時就話係對家啫，喺立法會大家就係同事，思想唔應該咁狹窄，非黑即白喎。
楊岳橋郭家麒親釀手工啤
另外，為咗籌款，公文袋黨魁楊岳橋會同埋該黨議員郭家麒親自釀製手工啤酒，晚宴時可以開桶試飲，而主要負責籌款晚宴嘅公文袋議員陳淑莊就會打悲情牌，以自己因參與佔領行動被起訴為由呼籲大家捐錢。至於青年公民亦會成立特別小組，協助創作獨特同有創意嘅籌款節目，希望藉小鮮肉效應令善長大解慳囊。公文袋預計今次籌款額可有一百萬元。
咁啱得咁蹺，原來公文袋晚宴場地同白鴿黨上月舉行黨慶嘅場地一樣，當日白鴿黨將場地布置得美輪美奐，珠玉在前，公文袋中人就話怕到時畀人貨比貨。距離晚宴仲有約一個月時間，睇嚟公文袋都要動動腦筋，否則籌款數字唔達標，真係勒緊褲頭都唔得掂喇。