中環出更：象哥自爆書法了得 同阿王不相伯仲
立法會前議員王國興（阿王）經常揮毫寫大字，係人都知佢寫得唔錯，原來中華出入口商會（中出）立法會代表黃定光（象哥）都寫得一手好書法。早前中出舉辦一場鼓勵學生閱讀嘅嘉年華活動，象哥都有去撐場。講起讀書寫字，象哥聲稱佢手字同阿王不相伯仲，若果兩人鬥寫二、三寸之內嘅字，阿王同佢冇得揮喎！
象哥話，好似揮春福字咁大嘅字，先至叫做大字，阿王寫大字靚過佢，但係寫細字佢就自認叻過阿王。咁點解從來唔見佢喺立法會騷吓實力？象哥就話唔鍾意咁張揚，不過佢批示文件都係用毛筆o架！身旁嘅中出榮譽會長莊成鑫就證實象哥手字真係好靚，難怪象哥好威咁話自己唔係吹水o架！
楊靜話中國人要識中文寫作
同場仲有中出會長張學修、婦委會主席楊靜（Sally）同埋青委主席蔡德昇（Stanley）等人，孔教學院副院長湯惠心都代表爸爸湯恩佳出席。Sally認為中國人始終要識得用中文寫作，所以推動中學生閱讀、寫作，然後幫佢哋出書，咁做有助於啟發學生對閱讀嘅興趣，十分有意義。
Stanley就話，家中三個小朋友嘅語文強項各有不同，大仔叻英文，次子就叻中文，笑稱係同一個阿媽生，但係發展好唔同。咁佢太太李美辰叻邊樣？Stanley話係英文，仲爆料話太太讀咗個教育文憑，去年開始喺瑪利諾中學教英文，難怪近年好少見佢喇！
卓妮