港珠澳大橋珠海連接線嘅拱北隧道段尋日貫通，預計年底具備通車條件，反觀香港段工程就多甩漏，勞工處仲話喺二○一一年動工以嚟，因違規而被判罰局部停工嘅總日數接近兩年。有學者都話連串工程不利消息，反映大橋香港段喺今年底通車並唔樂觀，批評港府至今仍係「口硬」，唔肯承認香港段工程緩慢連累大橋通車無期。咁講擺明係衝住運輸及房屋局局長張炳良而嚟，而佢做多兩個幾月貨仔就走人，呢個爛攤子肯定留畀下一手執喇！
