政情：故宮客如潮湧 單霽翔控制有道
博物館當然愈多人參觀愈好。不過北京故宮博物院院長單霽翔就為太多遊人入場而煩惱。單霽翔尋日來港出席一個講座時，分享處理人流嘅趣聞。佢話二○一二年，故宮入場人次已突破一千五百萬，遊人大排長龍，笑稱擠迫到連地面都見唔到。
由於人潮無法疏散，試過已經過咗開放時間仍有大批遊人喺故宮內排隊參觀。為免掃興，院方就等佢哋睇完至走，結果要等到清晨先至清晒場。單霽翔又話，院方嘗試設定入場人數上限至每日八萬，誰知新措施一出，大批向隅民眾聚集喺售票窗前鼓譟，驚動公安來調停。後來院方鼓勵網上購票，同埋提供淡季優惠，總算可以控制到人流。
話西九故宮文化館算早公布
講到引起滿城風雨嘅西九故宮文化館，單霽翔認為，港府同北京有關方面未簽正式協議前，就向社會公布算係早o架喇，希望喺正式協議簽訂之前，廣泛聽取社會各界意見，令西九故宮館成為大家都喜歡嘅博物館。