政情：法律界兩男神落廚鬥嚇人

其實下廚對蔡騏無難度，不過平時一個人就懶得煮，反而每周都會為愛犬開爐，務求佢食得健康，所以煮畀狗食多過畀人食。佢話愛犬嘅菜單每個星期都會轉換，分別有魚、雞、牛，伙食都唔錯。佢尋日就預備咗法式焦糖燉蛋，但因火槍失靈而未能完成，浪費咗一番心機添！

Wilson就整咗蝴蝶酥，雖然佢單手灑糖好似功架十足，但整兩盤就有一盤焗燶咗。不過蔡騏好畀面，大讚味道唔錯，仲夠香脆喎！

任建峰批民主思路

講到傘後組織似乎低調好多，法政匯思另一召集人任建峰就話，佢哋仍默默工作，認為傘後組織唔好只以曝光率為目標去做嘢。至於中間派，佢話中間路線係「不屈服、少抗爭」，但係民主思路只做到「不抗爭」，行徑無異於投降喇！