政情：當年棄揀華富邨 張炳良嘆走寶

嫌交通不便

立法會議員李慧琼同張國鈞尋日喺華富邨嘅辦事處開幕，嘉賓張炳良透露自己同華富邨緣慳一面。原來佢細個仲讀緊書時，一家人住喺板間房輪候上公屋，後來終於抽中華富邨，睇完樓都好滿意。但係當時佢喺灣仔讀中學，最終因為交通不便而放棄。

張國鈞就話，華富邨雖然交通唔太方便，但就充滿人情味。邨內居民不時會自製特色小食，好似雞屎藤等互相分享。大時大節例如盂蘭節等，邨內大廈成幅外牆會掛上十幾層樓高嘅紙製花牌。到咗中秋節，附近薄扶林村嘅舞火龍亦會經過華富邨，氣氛好熱鬧。