政情：仲未收工 高永文決心補中
今屆政府任期餘下不足三個月，有傳食物及衞生局（食衞局）局長高永文已着手搵地方重開醫務所，多數唔會連任。不過，高永文冇好似其他hea做等收工嘅司局長，據聞佢決心喺任期完成前，令上年因為拉布而胎死腹中嘅《私營骨灰安置所條例草案》完成審議，仲已經霸佔有利時間提交立法會審議，唔會留低「蘇州屎」畀下任局長。
高永文自加入政府以來，民望喺一眾高官之中一直名列前茅，好似雙非孕婦同奶粉荒等問題，佢都處理得不過不失。不過喺上屆立法會尾聲，佢負責嘅《醫生註冊條例草案》觸礁，連帶令《消防條例草案》同埋《私營骨灰安置所條例草案》都「攬炒」收場，無法如期審議。
斬開兩截防被打尖
面對任內嘅兩大遺憾，高永文今年就積極補鑊。據了解，食衞局爭取喺立法會二讀同三讀《撥款條例草案》之間，將《私營骨灰安置所條例草案》提交上立法會。若果咁做，將會令《私營骨灰安置所條例草案》嘅審議被斬開兩截，頭一截喺四月十二和十三日，第二截就會喺五月底完成審議《撥款條例草案》之後再繼續。
雖然上述做法無法一氣呵成，較為迂迴，但就確保唔會有其他政策局「打尖」，搶走日子令《私營骨灰安置所條例草案》唔可以如期完成。高永文連咁樣嘅安排都可以接受，可見佢想通過草案嘅決心好大。
至於另一條被拉死、有關醫委會改革嘅《醫生註冊條例草案》，就真係返魂乏術喇！事關該草案仍然要等待三方平台作出商議，有排等，預料高永文六月底離任前都做唔切，所以將會成為佢任內嘅遺憾。
話時話，高永文作為民望最高嘅問責官員，面對政治熱廚房，好多事仍然係束手無策，唔知新任局長會唔會有足夠政治能量完成任務呢？