中環出更：「誤人子弟」 張宇人無意掌教局
候任特首林鄭月娥為組班煩惱到發噩夢，自由黨黨魁鍾國斌（Felix）尋日喺一個電視台節目上，公開推薦該黨主席張宇人（Tommy）出任教育局局長。惟被點名嘅Tommy接受查詢時，澄清無意執掌教育局，仲自嘲「誤人子弟，何必呢？」究竟佢哋係無聊得滯，講吓笑娛樂市民，定係內有乾坤？
鍾國斌大讚張係合適人選
Felix喺節目中笑着大讚Tommy熟悉教育，唔單止可以繼續喺下一屆政府出任行政會議成員，仲係下一任教育局局長嘅合適人選，相信Tommy可配合新政府施政咁話。
不過黨魁有心，主席恐怕無夢。Tommy直言對被推薦一事感到一頭霧水，又若有所指稱：「誤人子弟，何必呢？」唔知Tommy係指倘若自己執掌教育局，會誤人子弟，抑或係暗寸黨友Felix誤導公眾呢？
講笑還講笑，兩人講法一致嘅係自由黨正在草擬一份人才名單畀林鄭月娥。惟據悉因為林鄭行程太緊密，雙方最快都要等到下月初先至可以會面。
卓妮