中環出更：名人時尚心法 愛襯不亂跟
港人潮流觸覺一向敏銳，不過時尚並唔代表盲目跟風，好似唔少日本人着涼鞋加短襪咁，早前就有調查話超過四成半港人接受唔到喇。卓妮早前喺一個活動上見到一班城中名人，唔少人都抗拒標奇立異嘅配搭。香港菁英會體育研究會主席潘偉業嘅太太鄺晶晶就話，學生時期有段日子好興螢光絲襪，佢都有着o架，不過結咗婚兼做埋媽咪之後，打扮最緊要斯文，所以就唔會亂跟風喇！
早前莎莎舉辦慈善演唱會，莎莎主席郭少明及太太郭羅桂珍、女兒郭詩慧及其丈夫陳振邦全家出動。講起穿搭技巧，鄺晶晶話讀書時會着得潮啲，但係自從出嚟工作、結婚生仔後，打扮就逐漸變斯文，不過唔代表佢脫節咗喎，佢都留意到近期好多人着魚網絲襪襯爛牛仔褲，不過佢就唔會咁着咁解啫！
郭詩慧話襯到靚先好玩
郭詩慧話，咩款都不妨一試，慢慢襯到靚為止咁先好玩，就算係豹紋或魚網絲襪都總有方法襯到嘅。同場仲有食物及衞生局副局長陳肇始、香港化粧品同業協會理事洪玉芝及老公陳泳聰，「翡翠皇后」董吳玲玲兒子董必政等。
陳肇始自爆做學生時曾瞞住阿媽買鬆糕鞋，佢嘅着衫品味喺一眾女高官之中都算時有驚喜。呢日佢就着咗件紅色大花撞格仔紋外套，咁難駕馭嘅衫着喺佢身上，睇落又幾精神。原來佢細個好鍾意睇時裝雜誌，雖然依家已經冇睇好多年，因為日日夜夜都用晒啲時間嚟睇文件，但襯衫嘅觸覺已經一早變成佢嘅本能喇！
卓妮