政情：朱容基改名有段古 唔使靠師傅
俗語話「唔怕生壞命，最怕改錯名」。早前中華出入口商會婦女委員會主席楊靜同做珠寶生意嘅老公（Benson）一齊出席活動，細心一看Benson嘅卡片，忍唔住笑咗出來，事關佢嘅中文名叫朱容基，同被稱為「鐵面宰相」嘅國務院前總理朱鎔基同音。唔通純屬巧合？
原名叫朱天
Benson係香港珠寶製造廠商會中國內地事務小組成員，佢笑稱自己原名朱天，廿幾年前由上海來港定居後，香港朋友話佢個名太「勁」，於是佢就自己改。由於佢爸爸同朱鎔基好似樣，而且大家都係上海人，加上朱鎔基家喻戶曉，形象好好，而且「容基」寓意「容易打基礎」，所以就決定用呢個名喇！
結果Benson嘅事業發展又真係順風順水，事關佢一遞張卡片出來，個個人即刻笑晒，對佢印象特別深刻，生意都易做啲，睇嚟佢唔止改啱名，仲唔使搵算命師傅添！