政情：「芫荽控」高佬賢 唔食芫荽薯片
芫荽同榴槤一樣，鍾意嘅愛不釋手，但厭惡者就見到都掉頭走。立法會漁農界議員何俊賢（高佬賢）係「芫荽控」，但係最近市面有潮食芫荽味薯片，高佬賢一聽到即耍手擰頭，仲反問點解唔食新鮮食材喎！
覺得加咗好奇怪
高佬賢話都係鍾情原味同辣味薯片，覺得加入芫荽味有啲奇怪，就算係加入其他食物味道嘅薯片，好似燒骨、薄餅等都一律唔食，真係好有要求。不過佢就話蘿蔔青菜，各有所愛，好似佢鍾意食芫荽，連榴槤都一樣唔抗拒。
講起芫荽，高佬賢細數同芫荽有關嘅餸菜，大讚芫荽皮蛋湯美味，芫荽炒燒肉味道都好夾，而打邊爐時就更要加上大量芫荽添！其實佢住村屋，都可以種芫荽自給自足，但佢就話無時間去打理農作物，而且屋企附近有車輛停泊，多廢氣，所以種咗都唔敢食喎！