政情：告別大佬派 建制暢順晒

今屆立法會建制派由商界議員廖長江接替葉國謙擔任「班長」，開局半年都未有甩轆事件發生，大家亦似乎團結咗好多。好似立法會開鑼之初，青年新政游蕙禎、梁頌恆嘅宣誓風波，建制派由聯署譴責到拉隊離場製造流會以示抗議都冇出事。有建制派議員就話係同建制派一眾「大佬」唔再連任有關。

自由黨唔再搞不合作運動

聽聞以田少為核心嘅自由黨，喺上屆立法會可以話花招百出，每當建制派召集開會，商討政府推出嘅政策措施或商討投票意向時，自由黨總係一副「唔使預我」嘅態度。此外，反對派經常「拉布」令到建制派要「輪班」出席會議以防流會，但係自由黨更加愛理不理，甚至揚言該黨只留部分議員開會，此舉令其他建制派大感不滿。

不過今屆田少收檔後，該黨飲食界議員張宇人出任黨主席，又獲委任為行政會議成員，自由黨亦漸漸同建制派建立番緊密關係，唔再搞不合作運動。而獨立建制派議員謝偉俊唔知係咪終於可以擔正出任委員會主席，今屆亦冇再咁「神經刀」，可以話走向「實幹型」。

另一方面，自從廖長江出任建制派召集人後，可以話係去除咗「大佬文化」。有建制派就話，過往葉國謙任「班長」時，「啲嘢唔知邊度傾完就壓落嚟」，好似落柯打咁，完全冇商冇量，唔少建制派議員都對此唔服氣，但始終敢怒不敢言。今屆立法會建制派開會氣氛就和諧好多，大家共同商議，就連周浩鼎幾位新丁議員都可以提出意見。

建制派會議踢走「大佬文化」，運作都暢順咗，唔知會唔會諗諗計，令立法會整體嘅運作再有效率呢？