中環出更：何啟明爭補選 先戰馮檢基
青年新政游蕙禎及梁頌恆因宣誓風波而取消議員資格，令到九龍西及新界東議席出缺，成為政黨必爭戰場。去年參加立法會選舉嘅民協深水埗區議員何啟明，率先於社交網站宣布考慮參選，呢個舉動直衝被傳有意參選嘅民協元老、前立法會議員馮檢基，何啟明預料本月內會完成黨內初選；而馮檢基就不評論是否有意參選。
袁海文都打算參加
何啟明除咗表明考慮參選外，亦透露向民協申請啟動黨內初選程序，佢話黨內初選程序要喺本月內完成，因為補選將於暑假進行，六月已經要報名，強調時間緊迫。佢又透露，民協上下都得悉只有佢同馮檢基有意出選，認為民協面臨傳承問題，希望改變「民協等於馮檢基」嘅印象。不過，佢就話兩人同樣主打民生，基本盤係一樣，但係佢更有能力吸納年輕人同埋激進票源喎。
據了解，民主黨深水埗區議員袁海文都打算參加補選，何啟明就話大家有傾過，亦同樣要先爭取所屬黨內嘅支持，所以參加民主派初選係後話，更形容初選「十畫都未有一撇」，仍有不少未知數。唔知泛民最後會否各不相讓，繼而再次出現有人突然要陣前棄選呢？
卓妮