中環出更：商界助更生 張鍾麗裳大讚正氣
商界助更生委員會早前喺上環一間酒樓舉行午間茶敍分享會，主席何偉權（Ken）、會長郭棟強（Simon）同埋中西區區議會主席葉永成都有出席，Ken話茶敍目的係向出席嘅商界及地區人士傳遞更生訊息。中國古董文物藝術修復專家張鍾麗裳（Lisa）都喺度，事關佢係助更生副會長，卓妮見Lisa同Simon一見面即好熱情咁打招呼，Lisa仲形容Simon係佢嘅金主，點解？
Lisa笑住解畫話，Simon經常喺慈善拍賣活動上競投佢捐出嘅拍賣品，有時價值二、三萬元嘅嘢，出價到十幾萬元，形容佢好有愛心。Lisa嘅籌款成績咁理想，梗係好開心，難怪要叫Simon一聲「金主」喇！佢亦讚商界助更生嘅活動好有意義，夠晒正氣。
郭棟強籲申請做愛心僱主
做建築工程生意嘅Simon就話，建築業長期需要大量招聘人手，所以佢好支持更生人士視像招聘會，呢幾年都有提供工作機會畀即將出獄嘅在囚人士，仲即場呼籲商界踴躍申請做愛心僱主。
葉永成就分享當年帶一班學生哥去監獄探訪，去程眾人喺旅遊巴上吱吱喳喳，回程卻鴉雀無聲，因為佢哋聽咗一位重犯語重心長回憶犯罪過程。佢話呢啲探訪令血氣方剛嘅青少年有所領悟，有助於防患於未然。
除咗培訓一技之長，懲教署助理署長鄧秉明話，讀書亦可改變在囚人士嘅世界觀及價值觀，將破壞力變成建設動力。去年就有個終身監禁囚犯申請讀博士，可能係世界第一個添！
卓妮