中環出更：胡劍江踢爆竹戰高手吳宏斌
香港國際珠寶展早前喺灣仔會展舉行，城中珠寶業界名人齊去搵商機或設計靈感。卓妮見有份籌備今次珠寶展嘅潮州商會會長胡劍江及中華廠商聯合會副會長吳宏斌好好傾，胡劍江笑笑口話，兩人唔止係珠寶業行家，亦都係潮州人，親上加親，自然啱傾。聽講吳宏斌有意競逐廠商會下一屆會長，胡劍江好爽快話支持佢，仲話樣樣嘢都可以支持，唯獨打麻雀免問，點解？
胡劍江笑笑口話，吳宏斌係麻雀枱上嘅長勝將軍，但佢自己打麻雀就好水魚，唔夠佢打，所以如果叫佢同吳宏斌打幾圈，不如直接交本支票簿畀對方填銀碼算數喎！吳宏斌就笑稱平時同朋友打吓衞生麻雀啫，唔使攞本支票簿出嚟咁大陣仗喎！
劉黃寧達設計珠寶要「貼地」
講返珠寶展，國際珠寶設計師協會（協會）主席吳景瀚（Kevin）同埋名媛珠寶設計師劉黃寧達（Leta）都有入場，Leta係協會嘅資深會員，佢透露正設計全新嘅《愛》系列珠寶，希望走大眾化路線，令佩戴嘅人隨時感受愛，令社會更和諧。Kevin就話協會會員九成係外國人，所以趁大家嚟香港參展期間舉行改選，並慶祝成立十周年。
珠寶業潮流興原創及個性化設計，香港品牌總商會理事陳惠檳（Kenny）間珠寶公司就取得今屆國際珠寶設計大獎公開組冠軍。Kenny話得獎作品係用坦桑石設計，適逢今年係坦桑石誕生五十周年，特別有意義。
卓妮