中環出更:施榮懷手機靚冧巴值幾萬人仔

手機靚冧巴難求,好多人不惜重金買入心頭好。中華廠商聯合會(廠商會)永遠名譽會長施榮懷(Irons)尋日就自爆,佢個內地手機電話用咗廿幾年,冧巴好靚,至今耐唔耐都有人傳訊息問佢賣唔賣。佢隨即背個號碼出來,原來最尾四個數字都係三,難怪佢話可以賣到幾萬蚊人仔,有價有市喇!

廠商會尋日舉行傳媒午宴,會長李秀恒、立法會議員吳永嘉等人都有出席。講到最近中央宣布將取消收取跨省嘅手機長途及漫遊費用,個個都拍晒手掌。

吳國安讚撤跨省電話費

現時港商為咗慳番電話費,經常一人同時擁有幾張內地電話卡。吳永嘉就有三張,包括重慶、北京同廣東省三地發出嘅電話卡,用咁多張卡就衍生一個問題,就係好多人認唔到係佢打嚟,結果被迫成日用北京嗰張,交電話費時好肉痛。

廠商會會董吳國安都有廣東卡同上海卡,事關佢喺兩地都有廠房。佢話取消跨省長途電話費之後,可以令電話費成本減低,員工往返兩地亦都慳番唔少。

同場仲有展覽服務公司主席戴澤良,早前佢講過六月底喺北京舉行嘅香港品牌節同北京工展會,因為成本高要蝕住做,尋日佢又呻話北京基於安全考慮,謝絕舉行工展小姐選舉同歌星表演等群眾聚集嘅活動,又唔准佢哋大肆宣傳,令工展會嘅熱鬧氣氛大打折扣。

被問到搵民政事務局前常秘楊立門做行政總裁嘅傳聞,李秀恒就話現正等政府審批,一有好消息就會對外公布。

卓妮

第一手消息請下載on.cc東網iPhone/iPad/Android/Windows Phone Apps