政情：區議會冇哺乳室 陳家珮借主席房泵奶
南區區議員陳家珮（Judy）係新手媽媽，但佢只係做咗媽媽短短兩個月，就患上俗稱「媽媽手」嘅狹窄性肌腱滑膜炎，佢又認為政府建築物內應該設立哺乳室添！咁有感觸，係因為佢選擇餵哺母乳，要定時泵奶，但係南區區議會冇哺乳室，好彩得到主席朱慶虹借出主席房畀佢用咋！
期待去印尼參加婚禮叉電
Judy話，朱慶虹話歡迎佢帶埋囝囝去開會，不過囝囝依家仲細，要等佢大少少先帶佢去喎！依家Judy要捱夜餵奶同掃風，每晚只能夠斷續咁瞓，所以好期待遲啲去印尼參加朋友婚禮當放假。不過佢已預料到時會掛住囝囝，所以只會喺當地逗留兩日，盡快返香港咁話。
講起哺乳室，Judy話香港商場普遍都有，呢方面做得比政府好。不過美國就更加完善，因為洗手間仲有梳化畀媽媽坐，而且同如廁地方相距遠，衞生環境好好，所以整體而言，香港喺呢方面仍有所不足。