政情：霍震霆踢爆啟剛係「學霸」
港協暨奧委會副會長霍啟剛一向熱心於香港嘅體育發展事務，間唔中亦會跑吓馬拉松，仲娶咗跳水國寶郭晶晶添。不過，原來啟剛唔單止熱衷於體育運動，仲係一個「學霸」。有內地媒體訪問前立法會議員霍震霆，佢就提起作為「富三代」嘅大仔啟剛係一個標準「學霸」，當年以全A優異成績考入牛津大學，兼攞埋經濟學及管理學學士學位。唔知啟剛有咩讀書心得呢？
盼延續霍英東體育貢獻
啟剛讀書咁叻，身為爸爸嘅霍震霆當然好自豪。講到對啟剛嘅期望，就話其父霍英東一直都致力幫助中國體育事業發展，仲成立咗霍英東體育基金，為中國申奧、運動健兒以及體育場館設施建設都有作出貢獻。佢就希望同啟剛可以將霍英東呢種奉獻精神延續落去。霍震霆仲喺訪問中提到，有意思嘅係啟剛娶咗跳水運動員郭晶晶，令人津津樂道，睇嚟佢對呢段婚姻都好滿意喎。