中環出更:搞事四人幫 黎宅密會拆蟹

壹傳媒黎智英(漢奸黎)上周三去台灣,之後就喺壹傳媒旗下刊物《壹週刊》同《蘋果日報》撰文,自爆曾經同兩名美國鷹派前外交官及美軍高層會面,兼大讚美國總統特朗普。事隔幾日,漢奸黎已經返咗香港,尋日仲訂埋啲蟹,喺屋企等有「李漢奸」之稱嘅民主黨創黨主席李柱銘、「民主阿婆」前政務司司長陳方安生以及天主教香港教區前主教陳日君上門。「搞事四人幫」又再齊集,莫非佢哋一路拆蟹,一路聽漢奸黎擦美國鞋?

搞事四人幫尋日又喺漢奸黎何文田寓所攪局。喺李漢奸等人到達黎宅之前,大約三時三十分,就有一架大貨車駛至黎宅,原來係運送海鮮嘅送貨車。

貨車上嘅人拎咗三隻花蟹出嚟,交畀疑似係黎宅聘請嘅廚師,仲問啲蟹點樣整。廚師就話可能整凍蟹,似乎係為夜晚飯局而設喇。

而李漢奸就喺下午六時許,自己揸車載住太太同埋一對男女去到漢奸黎屋企。佢哋入咗屋冇幾耐,漢奸黎嘅私家車亦都返回大宅,不過私家車上除咗漢奸黎嘅司機外,前排座位仲有民主阿婆,而後排座位就有陳日君同神父劉勝義。

七人逗留超過兩個半鐘

講開又講,陳日君都有一排冇去黎宅,上次出現已經係去年十一月感恩節前夕。七人逗留咗超過兩個半小時,直到晚上九時左右先至離開。話時話,本月二十六日就係特首選舉,搞事四人幫喺呢個時候聚首一堂,唔知係咪商量啲乜嘢搞事大計呢?

卓妮

第一手消息請下載on.cc東網iPhone/iPad/Android/Windows Phone Apps