政情：劉夢熊出冊翌日 約定白鴿黨飯敍
繼早前為前特首曾蔭權爵士上周因公職人員行為失當罪成寫求情信後，民主黨（白鴿黨）又會同原全國政協委員劉夢熊下個禮拜出冊後飯敍，幫劉夢熊洗霉氣，唔通白鴿黨轉咗行？
將於下周一刑滿
劉夢熊喺舊年年初因妨礙司法公正罪成判囚十八個月，將於本月二十七日（下周一）刑滿出獄。身繫囚牢嘅劉夢熊，原來早已為「迎接」自己「出冊」作好安排。據聞，佢早前已相約政界老友，喺二十七日到赤柱監獄門外接佢出獄，但未知有多少人會到場，而喺重獲自由後，又急不及待同好友飯敍。
據悉，佢已約咗包括白鴿黨前主席劉慧卿、單仲偕等各界好友，喺佢出冊翌日、即二十八號晚上到尖沙咀某上海食肆食飯，為佢洗霉氣。難得重獲自由，又同班好友久別重逢，唔知劉夢熊到時會唔會就呢年幾嘅牢獄生涯大吐苦水呢？