政情：謝偉銓搞智庫 舊同事勸出山
喺今屆立法會選舉中因策略失利而失去建築界議席嘅謝偉銓（Tony）已退居幕後，尋日佢就為新成立嘅智庫舉行新聞發布會。雖則佢喺致詞時話離開咗繁忙嘅議會工作，令佢能享受較為輕鬆嘅日子，相信在座多位議員都享受唔到呢啲日子，似乎未考慮日後有可能出現嘅補選，但多名撐場嘅建制派舊同僚就好希望佢重出江湖，打唔打動佢呢？
嚟撐場嘅財委會主席陳健波冇放棄請Tony出山嘅念頭，仲向傳媒話：「冇咗佢好辛苦，佢先係重炮手」被問到係咪想Tony重出江湖時，佢仲話「梗係祝佢成功啦！」跟住仲笑問咁講使唔使選舉經費添！而葛珮帆（EQ）亦指Tony「好好人、好支持佢、好期待（他出山）」。
暫無考慮補選事宜
有冇心郁郁呢？Tony就話重出江湖要考慮好多因素，包括最終係咪會有補選同埋會唔會得到建築界嘅支持等。佢又分析，指上次選委會選舉反映出泛民陣營嘅選民喺投票時較踴躍，而立法會選舉建制陣營整體得票較多亦只係數字上較多，唔能夠反映實況，重申佢目前只會集中處理智庫嘅工作，冇考慮補選嘅事宜。