政情：公民講場：唔見李國寶 廉署未釋疑

前特首曾蔭權爵士公職人員行為失當罪成，正等候判刑。惟審訊期間，廉政公署透露因為相信捲入案中嘅東亞銀行主席兼雄濤股東李國寶唔會合作，最終決定唔接見李國寶，做法引起爭議。曾任廉署調查主任嘅立法會議員林卓廷批評有關做法違反廉署對給予或收受利益者徹查嘅方針，故去信廉政專員白韞六要求重新調查李國寶。眾所周知，李國寶同曾蔭權關係緊密，何況今次案情披露咗涉及三十五萬元嘅疑點，廉署若果唔公開交代同解釋，勢難解開普羅市民嘅滿腹疑團。