政情：劉大貝倡港撐初創改善經濟

香港經濟淡靜，商界似乎只能等運到。早前獲港府委任為經濟發展委員會委員嘅香港台灣工商協會前會長劉大貝（Darby）就話，內地為咗拉動經濟增長，最近提出「大眾創業，萬眾創新」政策，北京中關村通街都係初創企業。佢認為香港背靠內地，應該跟住呢項政策走，支持市民創業刺激經濟。

從事金融業嘅Darby來港十幾年，佢話香港嘅金融國際化係最大優點，呢方面優勢一定要保持住，唔可以被取代。不過為長遠計，必須嘗試多元化發展，特別係把握內地嘅政策走向，順勢推動科技及文化創新。

好似最近內地提出「大眾創業，萬眾創新」國策後，興起一股全民創業嘅風潮。來自台灣嘅Darby又舉例話，台灣政府推出政策要求銀行界支持文創產業，事關有創意嘅藝術家未必識做生意，所以需要銀行支持，但銀行又唔可以做蝕本生意，所以就由政府擔保。講就咁講，香港一提到要政府支持，各種阻力就出現，邊有咁易吖？