政情：未婚伍婉婷 擁六契仔女
早前喺一個活動見到香港島婦女聯會主席張雅麗（Carol）及灣仔區議員伍婉婷，已有兩名兒子嘅Carol三個月前又再添丁，眾人見到佢都連聲祝賀。
伍婉婷雖然仍未有另一半，不過佢已有六名契仔女，其中有一個係因為發夢見到伍婉婷救咗佢，所以認佢做契媽喎，好搞笑。
雖然香港女士單身好普遍，不過遇上情人節呢啲節日都幾頭痕，伍婉婷就笑稱啱啱過去嘅情人節開足全日會，唔怕身邊人放閃，而緣分嘅嘢佢亦唔會強求，會順其自然。反正身邊有一大班單身朋友陪佢，節日經常一齊過。
張雅麗生完仔仲咁弗
至於Carol啱啱生完仔，身形依然咁弗，除咗因為係「瘦底」之外，仲係因為工作忙碌。好似早前佢同家人去完澳洲返嚟，出席當日活動後又急急腳趕住飛去上海工作，難怪唔需要特地修身，體重已經自動回落喇！