政情：波哥fb論剪布 引粗口留言
身兼立法會財務委員會主席嘅保險界議員陳健波（波哥）半年前開設新facebook個人專頁，同網民分享對養生同投資嘅睇法。不過專頁拍晒烏蠅，半年嚟只有二千幾個Like，每個post平均得十幾個留言。
開設專頁半年拍烏蠅
但係近排留言人數有突破性進展，事關佢拍咗一段解釋早前喺財委會就問責官員加薪議案剪布嘅片段，結果就吸引數百個留言，不過大部分人都係惡言相向，真係陰功喇！波哥話，佢拍咗段片向網民解釋點解剪布，仲歡迎網民留言。點知突然間好多人留言，有人叫佢自殺死，又有好多人講粗口。
波哥就話唔介意，只要無粗口佢都唔會刪，但對於爛口網民，自己仍然要慢慢習慣喎！
波哥話日後仍然會拍多啲片，等網民對佢有更多認識。未來除咗繼續拍「波哥保健台」介紹養生，仲會有投資台教年輕人置業，唔知呢啲內容會吸「Like」定吸「嬲」多呢？