政情：議員驚弓鳥「利申」奇怪濕碎
自從二○一三年多名立法會議員被踢爆接受國泰航空款待遊法國後，議員向立法會秘書處登記個人利益時就愈趨濕碎，係又報，唔係又報。最近就有議員連收到機構送利是封都報埋一份。我哋翻查議員最新個人登記冊，發現文化界議員馬逢國同資訊科技界議員莫乃光（Charles）分別申報收到「名貴」禮物添！
馬逢國申報獲邀去韓國出席文化交流會，仲包機票食宿，不過最令人噴飯嘅係參訪理由竟然係「作為香港議員代表，藉此表達文化和維持世界和平的看法」，點都諗唔到馬逢國同維持世界和平有乜直接關係，連佢自己都直言，去到都係齋聽其他嘉賓意見，自己冇講嘢。唔知主辦單位有冇後悔搵錯人呢？
主辦方包機票食宿
話說馬逢國獲民間團體天宙和平聯合會邀請，喺二月二至五日去韓國首爾出席一個文化交流會，主辦一方仲支付埋往返機票、住宿同膳食開支添，聽落都有着數喎。馬逢國就話自己同呢個聯合會冇關係，今次係經人大代表蔡素玉介紹，聯合會仲託佢搵多幾位立法會議員出席，不過馬逢國就畀其他議員請食檸檬，所以惟有自己去。問到佢去表達咗乜嘢關於維持世界和平嘅高見，佢就話可能南、北韓關係緊張，所以關注呢個議題，想聽多啲意見。不過佢自己就冇乜意見，所以去到都係齋聽喎！
999美元門票論初創
而Charles就收到價值九百九十九美元，即折合港幣約七千八百元嘅門票，聽落好似有明星或者猛人睇，但其實只係獲邀參加喺中環舉行嘅研討會。Charles解釋話，尋日同今日有機構喺中環元創坊舉辦初創公司比賽，佢只係獲邀出席研討會，由於活動本身要收費，所以邀請方循例畀張門票佢。不過因為尋日立法會工務小組委員會要開會，所以佢都只係快閃出席咗半個鐘，就趕返立法會開會喇！
話時話，幾千蚊一張門票，分分鐘貴過馬逢國去一次韓國嘅旅費，唔知Charles會唔會寧願獲邀去關心吓世界和平呢？