中環出更：陳偉南百歲生辰 逾千好友同賀
港人平均壽命位列全球之冠，香港潮屬社團總會（總會）創會主席陳偉南早前舉行百歲壽宴，邀請過千好友一齊慶祝，「國學大師」饒宗頤亦有現身向呢位多年摯友道賀。兩位百歲人瑞難得坐埋一齊，隨即吸引一大班後輩一窩蜂過嚟合照，氣氛好熱鬧。
呢日現場嘅布置古色古香，係參照陳偉南喺家鄉潮州嘅祖屋打造而成，有份籌備今次活動嘅總會名譽會長黃書銳、秘書長方平及副秘書長鄭敬凱就話，佢哋特登返去潮州視察，所有雕刻同掛畫都係跟住造，連影相位都係陳偉南祖屋大廳嘅擺設，好有意思㗎！
撞正情人節 窩心派朱古力
陳偉南兒子陳幼南、孫仔陳誠傑同孫女陳佩君都有到場。點解陳偉南咁長壽健康？陳佩君就大爆秘訣，話阿爺食嘢好健康，每朝都會食番薯同生菜，加上以前經常同家人行山，所以體魄咁好。
陳佩君仲話，當佢結婚時，爺爺話畀佢聽，一直都保存住佢喺日本求嚟送畀爺爺嘅平安符，所以咁長壽，聽到都覺得好溫馨。
陳偉南農曆正月十八生日，今年撞正情人節，陳偉南都好識做，送朱古力氹出席嘅女士。中華廠商聯合會前副會長顏吳餘英就笑指，老公顏培英唔浪漫，冇送過花畀佢，仲話潮州男人唔送花喎，好在佢生咗一個浪漫嘅仔，代替阿爸訂花送畀佢。
中華總商會常董方文雄就帶埋老婆出席，問佢阿仔平時會唔會幫佢慶生，佢就笑言如果阿仔打電話畀佢，唔係話啲錢用晒而係關心佢，就夠晒窩心喎！
卓妮