格雷財色兼收

電影《格雷的五十道色戒 2》(Fifty Shades Darker)一上畫劣評如潮,好多網友仲話衰過第一集,睇四仔冇咁火滾喎!之但係首集埋單橫掃全球5.7億美元票房,而續集預告片一出街,首24小時內獲得1.14億次點擊,超越《星球大戰:原力覺醒》,創下電影史上首日最高點擊率新紀錄,勁呀!

其實呢套戲係咪爛片有乜所謂,講到尾都係班商家佬食住條水搵銀啫,最重要係觀眾受咪得囉!由2015年第一集出街後周邊產品多到爆,今日繼續嚟料,證明套戲係前菜,返歸同伴侶曳曳先係大家心中嘅「色戒」,趁住呢個愉虐熱潮未退,一齊溫故知新,睇吓有乜好玩啦!

冧女泰迪熊

話《Fifty Shades》係最搵食電影一啲都唔過分,事關由第一集推出嘅周邊產品多到你玩唔晒!由情趣玩具到紅酒,甚至毛公仔都有。港女至冧嘅泰迪熊(Teddy Bear),其實早喺第一集《Fifty Shades of Grey》已經推出15吋「Fifty Shades of Grey Bear」限量版,今日喺官網仲有貨賣,每隻售89.99美元(約702港元),仲唔買隻嚟冧女!

醉翁之意不在酒

第一集《Fifty Shades of Grey》喺美國上畫當日,正係呢支餐酒「Fifty Shades of Grey Darker Wine」面世之時,報稱加州製造,有紅酒及白酒兩款,官方話含有豐富可可、黑櫻桃、焦糖及丁香味,不過有巴打就話口感非常一般。但其實醉翁之意不在酒,買呢支酒嚟飲嘅無非係飲嗰份幻想,用作性暗示就最啱!

情侶卡Game

想嘗試愉虐刺激但又難以啟齒?簡單啦,有卡Game幫到你手!呢款叫「Fifty Shades of Grey Party Game」,官方表示適合3個人以上玩,抽卡玩家要跟住卡片上問題如實回答;而另一款叫「Fifty Shades of Grey - Red Room」嘅卡Game就最啱情侶玩,抽卡後要依照卡牌上指示去做,例如錫錫對方等,係咪好過癮先!

格雷T-Back

話掠水好、食潮流又好,推出「Fifty Shades內衣」實在唔少得,由英國品牌Coco de Mer攞正牌推出。呢間情趣用品品牌向來走高檔路線,連萬人迷碧咸及天后歌手Rihanna都係佢嘅常客。而趁住電影續集上畫,Coco de Mer就一口氣推出6個「Fifty Shades Darker by Coco de Mer」性感內衣系列,咪以為價錢好貴喎,一條T-Back都係15英鎊,舊幾水港紙就有交易,抵着!

愉虐套裝

玩愉虐點少得玩具呢?無錯,當第一集電影出街時,英國最大型情趣用品網站Lovehoney已經授權,獨家推出一系列「Fifty Shades of Grey」情趣用品,由小說封面最經典嘅眼罩、皮鞭到震棒都有齊,老實講一啲驚喜都冇,只係將坊間口碑好嘅玩具變成黑色,但問心都係玩個Feel,加上價錢唔算特別貴,故吸引唔少人買。但唔知係咪用家愉虐潮冷卻,雖然Lovehoney依舊有推出「Fifty Shades Darker」系列,但產品明顯無上一集時咁多,反而主打情侶玩具套裝,有興趣嘅自己上官網睇喇!

脫星恨之入骨

Fifty Shades嘅周邊產品,吃喝玩樂乜都齊,做生意嘅梗係Like啦,但可以肯定話你知,美國脫星就恨之入骨囉,原因唔係要順應市場口味多拍愉虐片,反而有睇過小說及電影嘅脫星,都覺得套戲幼稚、無聊、嘥時間,同脫星拍嘅愉性虐四仔根本冇得比,唔信?自己上網Search「5 Reasons Pornstars Hate 50 Shades of Grey」睇吓啦!

惡搞四仔

第一集收得全球5.7億美元票房,唔理佢好唔好睇,單睇銀碼已商機無限啦,四仔廠又點會放過搵錢機會先!喺第一集未出街時,美國四仔片廠已經瘋狂惡搞《Fifty Shades》,當中最有Heart又最快手嘅,係由Smash Pictures推出嘅《Fifty Shades of Grey A XXX Adaptation》,搵嚟索女Allie Haze做女主角,而嚟到電影續集,惡搞四仔叫做睇得吓嘅有呢3套囉!

「愉」人「愉」己

片名:《Fifty Shades Of Sara Jay 2》

內容:本片劇情完全同《Fifty Shades》無關,癡女脫星Sara Jay喺舊年底演出過上集後,今次食住熱潮演埋下集,故事當然係以愉虐為主,其他出場嘅脫星有老又嫩,雖然係低成本製作,但係睇Sara Jay「愉」人「愉」己,喺床上砌到癲,已經值回票價!

抄足原著

片名:《Ms. Grey: Darker》

內容:呢部係女同愉虐四仔,戲中不論場景同服飾都抄足原著電影,好睇在演出囡囡夠多,而且有劇情,片中嘅Ms. Grey之所以有鋪愉虐癮,原來係因為佢經常受虐,所以要搵其他女人發洩!

講求唯美

片名:《Darker Side Of Desire》

內容:呢套四仔好明顯係為咗睇女,上場嘅脫星平日極少玩愉虐,加上今次以唯美為主,唔算太重口味,拉埋女伴齊齊睇最適合不過!

撰文:祖