政情：王威信踢波常入廠 畀老婆詐型
元朗區議會副主席王威信（Wilson）為港超球隊九巴元朗足球會會長，年輕時亦曾踢過港隊青年軍代表香港出賽，與本地足球甚有淵源。不過佢現時踢波次數大減，一星期只踢得一次波，呢個轉變係同佢太太有關喎！
每星期踢得一次
Wilson上年曾因踢波受傷而入醫院，以前亦做過半月板手術，自言經常因踢波受傷而出入醫院。再加上與太太由認識到結婚，試過三至四次踢到入院，所以咪惹來太太落禁令囉！好彩太太深知Wilson依家踢波為與地區人士聯誼，踢波時會錫身啲，所以先批准佢去玩咁話。現時Wilson每個星期總有一日會晨早去踢波，形容呢個安排都好開心o架！
講起近期有球星退役，Wilson認為佢哋仍有實力去踢次一級聯賽，以延續球員生涯，不過其球隊暫無打算吸納呢類球員。佢解釋，球隊宗旨係畀機會來自元朗嘅後生仔，真係夠晒支持本地足球喎！