政情：着草美夢黃之鋒獻媚乞憐

佔領行動時提出 惟未能審議

美國民主、共和兩黨喺二○一四年香港佔領行動後期，曾經聯手草擬《香港民主人權法》，日後美國同中國達成任何新協議前，要先檢視香港嘅自治程度，但後來因為會期關係而未能審議。

事隔兩年，共和黨參議員魯比奧（Marco Rubio）、柯頓（Tom Cotton）以及民主黨參議員卡丁（Ben Cardin）舊事重提，重新推動法案，主要內容包括重申美國喺一九九二年通過嘅《美國香港政策法》（United States - Hong Kong Policy Act），即美國將香港視作一個喺政治、經濟同貿易層面上，同中國完全不同嘅地區，並喺對外政策上對中、港兩者有不同對待；同時恢復以往措施，如議案獲得通過，美國國務卿須於九十日內提交首份涉及香港民主發展嘅報告，之後每年都要提交，直至二○二三年。

針對中國 為回歸廿周年贈興

而今次嘅法案更包括針對中國嘅具體建議，例如給予美國總統權力，所有喺美國眼中視為打壓香港民主嘅人士，包括中港官員，都會被禁止入境美國同凍結喺美國嘅資產，呢份法案明顯係美國送畀香港回歸二十周年嘅「厚禮」。一向同山姆大叔眉來眼去嘅黃之鋒自不然有份參與攪局，佢喺上年十一月先至飛去華盛頓同魯比奧見面，當時黃之鋒曾經就中國同香港之間嘅高度自治關係指指點點，最終成功煽風點火，仲開到聲話想參加美國國會就《香港民主人權法》舉辦嘅聽證會議添！

黃之鋒搏命附和山姆大叔，口就話增加香港民主議價能力，實際就係為自己鋪定後路。皆因法案有一條列明，容許香港居民唔會因參與非暴力示威所留低嘅案底而被拒發簽證，黃之鋒有份參與佔領行動，又多次喺街頭興風作浪，惹上一大堆官司，如果日後法案獲通過，咁佢就唔驚無地方走人啦！