中環出更：囝囝忙公益高叔平做背後男人
男人在外闖蕩事業，背後總有一位默默支持嘅女人。早前上海總會（總會）舉行新春團拜，總會副理事長兼華明行董事長高叔平及大仔高鼎國（Geoffrey）都有到場，高叔平笑笑口形容自己係個仔「背後嘅男人」，事關近年Geoffrey忙於社會公益，做完香港鐘表業總會主席、獲選十大傑出青年，依家又做埋上海總會青年委員會聯席主任，成日喺外邊忙，顧唔到家族盤鐘錶生意，搞到高叔平要返工，冇得退休添！
雖然高叔平咁呻，但後生仔有顆服務社會嘅心，都好過淨係識得搵錢，佢都應該覺得安慰吖！同Geoffrey一齊做青委主任嘅車弘健就話，總會啱啱換屆，新任理事長李德麟銳意大搞，所以各委員會都行雙主任制，希望匯聚多啲人幫手做嘢。
車弘健話年輕化好重要
車弘健仲話，令總會年輕化係未來重要任務，青委將定期邀請江浙滬傑出人士開講座，為青年學生及會員分享人生經歷，港科院院長徐立之、已故「船王」包玉剛長女包陪慶都已應承做主講嘉賓。Geoffrey就話呢個系列講座有名（口架），叫做「上海精神 築夢前行」，目的係將上海精神宣揚出去。家族做瑞士名錶生意嘅佢笑稱，自己係做品牌嘅，講座梗係都要有名喇！
同場仲有上海海外聯誼會會長沙海林及一班國家級表演嘉賓，帶來一連串高水準嘅表演。李德麟話今年適逢總會成立四十周年，五月將舉行會慶暨就職典禮，一於好好慶祝開心吓。
卓妮