政情：戴耀廷借屍還魂搞民投
「佔領中環」發起人戴耀廷早前發起特首選舉公投計劃，但被私隱專員公署批評有誤導參加者及濫用個人資料之嫌，違反《個人資料（私隱）條例》，要求佢哋停止相關活動，令主辦團體「公民聯合行動」叫停公投。不過作為「公民聯合行動」代表同發言人嘅戴耀廷就借屍還魂重開電子提名，並改用以Telegram機械人程式設計嘅新電子提名系統，仲將提名期延長至下周五。
將轉用新系統
「公民聯合行動」尋日發新聞稿，指團體已同私隱專員會面，並決定停止使用原有嘅系統收集電子提名。但團體就會喺下周一上午重開以Telegram機械人設計嘅新電子提名系統，而該系統與去年「雷動計劃」時採用嘅「雷動聲吶」類似。呢招可以話係借屍還魂。
而第二階段嘅特首民間投票就會按原定時間開始同結束，即於下月十至十九日舉行，投票同樣採用Telegram新系統，但亦會設置實體票站。上次「雷動計劃」已經搞到一鑊泡，令部分泛民怨聲載道，今次戴耀廷又玩新花樣，真係死心不息。