政情：有相為證：洪為民揭獨愛紫呔之謎
衣飾配襯，講求顏色同設計，咁先會凸顯到個人風格。好似香港菁英會前主席洪為民（Witman）鍾情紫色呔，仲自爆曾經有人問佢係咪搵師傅算過呢隻顏色旺佢所以長期用？佢就解釋，完全冇呢件事，純粹係個人喜好啫！佢仲笑言有次打咗條綠色呔，反而畀人問佢嗰日做乜嘢事？係咪唔舒服？所以之後都係戴番紫色，覺得最襯自己喎。
講起政府早前公布會同深圳喺落馬洲河套地區發展港深創新科技園，Witman認為前海角色唔會同河套重疊，認為兩者嘅定位同分工喺本質上有所不同。
大談河套發展工作
佢話河套係香港地方，喺河套註冊嘅會係香港公司，嗰度適合發展精密製造業，例如生產一啲可穿戴式科技或無人機，加上港人於包裝同設計上做得好好，可以同內地合作發展高科技生產。
而喺前海註冊嘅會係深圳公司，可以做內地生意，目前係一個支援角色，以金融科技同服務業為主，唔涉及製造，所以唔認為發展河套會削弱前海吸引力。