政情：議員頻嗌錯銜頭當粒星透明
現屆政府問責局長上任超過四年半時間，餘下不足五個月任期，如果知名度仍然係偏低或者被當透明，真係有苦自己知。講緊嘅係環境局局長黃錦星，唔單止係來自泛民主派嘅立法會議員，一度誤將佢當為發展局局長，連分屬建制派嘅議員都蝦碌，除咗講錯黃錦星所屬嘅政策局為「環保局」，甚至連機電工程署屬唔屬佢管轄範圍都矇查查。黃錦星疑似連番被當透明，同負責宣揚減少浪費嘅「大嘥鬼」公仔嘅知名度，真係差天共地嘞。
立法會尋日繼續就特首梁振英任內最後一份施政報告嘅致謝議案進行辯論，其中喺涉及土地、房屋、交通、環境同保育政策嘅環節，多名議員唔知有心定無意，巧合地喺黃錦星面前連番出錯，涉及嘅都同環境局有關，真係撞都冇咁橋。
遭批評冇落力護郊野
首先係分屬泛民嘅立法會議員陳淑莊，佢本身係立法會環境事務委員會主席，理應同黃錦星較熟悉，但客觀事實就有出入。陳淑莊喺會上批評政府喺施政報告中提出要開發郊野公園邊陲地帶時，一度將黃錦星講錯係發展局局長，又批評對方應該有責任保護郊野公園，之不過依家就變相「賣仔」，質疑佢喺呢個議題工作未有盡責。
議會新丁、批發及零售界議員邵家輝發言時，本來係就黃錦星於環保工作表達感謝，但竟然甩轆叫佢做「環保局黃錦星局長」，邵之後又突然向黃錦星詢問，唔知機電工程署署長陳帆係咪隸屬佢嘅政策局，想趁機會讚陳帆平時有聆聽業界聲音。翻查資料顯示，機電工程署屬於發展局轄下嘅政府部門，邵家輝又喺黃錦星面前擺咗一個烏龍。
曲線反映工作欠成效
其實接連有議員叫錯或記錯同環境局有關嘅工作或事宜，某程度上曲線反映黃錦星喺過去四年幾嘅工作有幾大成效，或者凡此種種，都顯示黃錦星要喺餘下任期努力提升同類情況或周而復始出現，只會令相關政府同事感到更加冇癮！