中環出更：黃友嘉自嘲勞碌命積金要進取
福建社團聯會早前喺北角嘅會所舉行新春酒會，一眾閩籍政商界名人齊歡聚，強積金管理局主席黃友嘉（David）都有出席。近年強積金投資回報差強人意，但David自爆名下強積金投資回報唔錯，而佢嘅投資組合一直都係進取型。不過，有啲投資專家經常教人年紀輕可以揀進取型，臨近退休就要保守啲，唔知David係覺得自己仲後生，抑或對投資好有把握？點知佢自嘲係勞碌命，睇唔到退休嘅一日，所以要進取啲喎，真係識講笑！
同場仲有南旋集團主席王庭聰，雖然貴為上市公司老闆，但佢都有強積金戶口，投資策略就係穩陣偏進取型。咁成績如何？佢就笑稱冇睇，因為太濕碎，費事睇喎。David聞言即連聲恭維王庭聰係大老細，唔似佢要經常睇住喇！
董吳玲玲外遊教乖孫歷史
卓妮轉頭見善德基金會主席董吳玲玲同教育局政治助理施俊輝（Jeff）密密傾，原來佢哋交流緊年輕人嘅教育問題。董太話新年期間帶孫女去台灣玩，期間參觀孔廟同埋西班牙統治台灣期間興建嘅淡水紅毛城，趁機為孫女進行歷史教育。Jeff嘅女兒仲細，只得十個月大，佢話唔打算畀個囡返Playgroup，事關太早催谷會影響小朋友嘅學習興趣。
今年施政報告提出綜援長者福建養老計劃，福建社團聯會主席吳良好就話好開心，因為令好多鄉親受益。咁未來仲有冇嘢要爭取？佢就話香港穩定最緊要喎。
卓妮