政情：蜘蛛媽「變身」大戰三胞胎

鄭麗莎（Lisa）由「蜘蛛女」升呢做咗「蜘蛛媽媽」之後，真係好唔得閒，事關湊仔已經唔容易，而佢就一拖四，大仔加埋三胞胎總共四個，諗都諗到幾咁艱難，佢仲話自己依家日日扮牛、扮車添！

婚後三年抱四嘅Lisa，日前喺社交網站facebook上載咗張同三胞胎嘅合照，唔經唔覺三胞胎喺元宵節時已經滿六個月大，佢哋仲齊齊祝大家元宵節快樂，家庭幸福添！佢仲話等蛛bb有牙後先一齊食湯圓喎。

Lisa又分享湊囝囝嘅點滴，話一到夜晚，屋企就唔會有寧靜嘅一刻，事關抱住一個，另一個就爬上嚟，抱住另一個，另一個又喺度喊，搞到佢日日都要扮馬、扮牛、扮貓、扮狗同扮車氹佢哋。雖則係辛苦，但係睇Lisa個樣似乎好enjoy。

有網民就留言，話對Lisa湊仔嘅艱辛感同身受，仲話日頭都唔會寧靜，除非佢哋全部瞓晒覺喎！Lisa好快就回應話：「完全同意。」媽媽真係唔易做呀！