政情：補選照妖鏡 張秀賢眾叛親離
特首選戰之後，下一場選戰將會係因為青年新政梁頌恆、游蕙禎被取消議員資格後而引發嘅立法會議席補選。中大學生會前主席、前學民思潮發言人張秀賢，早前表明有意代表本土派出戰新界東補選，更聲言獲本土民主前線力撐。不過，有前學生領袖爆料，指張秀賢曾經就參選一事尋求「雙學」支持被拒，仲有人對於佢嘅「忽然本土」覺得好奇怪。
本身參與學生運動多年嘅張秀賢，喺個多月前被爆曾經接觸多個地區組織同本土團體，討論由佢以本土派「PlanB」嘅身份，參與新界東補選一事。據知，佢初步已獲得本土民主前線發言人黃台仰支持，但喺舊年九月立法會選舉被取消參選資格嘅另一發言人梁天琦就唔會參與。
被指立場曖昧難支持
雖然有本土派「新朋友」做大靠山，但張秀賢參選似乎未獲得舊戰友認同。據知，張秀賢就出選一事曾經搵過學聯嘅前成員同埋前學民思潮嘅成員支持，希望佢哋可以幫手站台。不過，有前學聯成員就直接喺一個好多人嘅WhatsApp群組拒絕，完全唔留情面；而前學民思潮召集人黃之鋒亦同其他人溝通過，唔會有同張秀賢共事過嘅人會支持佢出選。
有前學生領袖就話，本身係大中華膠嘅張秀賢為咗參選突然話自己自決，覺得佢政治立場唔可靠，又話張秀賢講到明自己係偏自決，憑乜嘢代表港獨、本土出選，可見佢為參選無所不用其極，講到尾就係覺得佢立場曖昧，唔值得支持。除咗雙學，據聞張秀賢都有同過東九龍社區關注組等多個地區組織接觸，但被指無政綱而拒絕支持。
多名單出選勢釀（界刂）票
話時話，就算唔知係民主派定自決派嘅張秀賢唔參加新界東補選，目前嘅局面都對民主派好不利，事關新同盟嘅立法會前議員范國威、前議員鄭家富、工黨、民主黨都話有意出選，雖然話民主派有意搞初選，但按過往嘅經驗都係搞唔成居多，加埋張秀賢出選可能最終會分薄票源，最後將議席拱手讓畀建制派。呢條數民主派點會唔計呀！