中環出更：保良局擴總部院童受益
保良局早前喺銅鑼灣總部舉行新春團拜，主席郭羅桂珍、副主席陳細潔同總理鄧宣宏雁（Emily）等董事局成員同管理層都有出席。今年保良局總部將展開擴建計劃，等新大樓完工後，居住喺屬二級歷史建築嘅中座大樓嘅三百幾個院童，就有新簇簇嘅地方住。Emily話住喺呢度嘅小朋友因為家庭問題而無法同父母一齊住，所以希望重建後可以提供更多戶外同多元化嘅生活空間，等佢哋開心快樂咁成長。
保良局行政總監陳欽勉就話，舊年城規會放寬總部重建嘅高度限制後，依家正積極進行規劃，有成百幾年歷史嘅中座大樓唔會拆，事關佢屬二級歷史建築。目前中座大樓有一大部分嘅用途係作為三百幾位小朋友嘅家舍，重建後院童會搬到新大樓，中座大樓就會進行活化。至於活化後嘅用途仲要從長計議。
除咗總部重建之外，今年仲有另一大工程要起動，就係元朗青年宿舍。陳欽勉預計今年會向立法會申請工程撥款。話時話，近年立法會拉布成風，審議法案慢過蝸牛，希望到時撥款申請唔好受阻喇！
郭少明攝太歲求心安
出席團拜嘅仲有總理譚毓楨、曹貴子同莎莎控股主席郭少明等人。卓妮見郭少明都有上香拜關帝，佢話好似佢咁嘅年紀，最緊要祈求身體健康。佢又話年年都去大坑天后廟為當年犯太歲嘅家人攝太歲，求個心安。講到新春期間生意情況，佢笑笑口話今年人流多咗，生意亦有好轉。仲話開門做生意，有人氣已算唔錯。聽落好似零售嚴冬已過，真係戥佢開心。
卓妮