政情：容海恩胡志偉開會齊咬手指
立法會人事編制小組委員會尋日八點晨咁早就開會，唔少出席會議嘅議員都疲態盡現，為咗令自己唔眼瞓，唔少議員都出盡法寶，好似新民黨容海恩（Eunice）同民主黨（白鴿黨）嘅胡志偉就不約而同咬手指，真係唔太衞生囉！
「咬手指」向來被視為壞習慣，唔少父母都要求子女大個就要戒，不過尋日開會未夠半粒鐘，就發現Eunice開始喺度咬拇指嘅手指甲，神情呆滯嘅Eunice完全旁若無人，估唔到原來佢都有呢個習慣。
容對此笑而不語
原本以為Eunice咬手指已經好令人驚奇，點知胡志偉都有同一習慣，而且胡志偉更加咬完拇指再咬其他手指，仲咬完左手咬右手添！事後問番Eunice咬手指一事，佢就「嘻嘻嘻」笑咗三聲，之後就無回應喇！