政情：口號同情趣App撞名 林鄭造勢甩鞋又甩轆
特首選舉參選人、前政務司司長林鄭月娥尋日舉行造勢大會，正式公布「同行We Connect」嘅競選口號，但隨即被網民發現口號同一款情趣手機應用程式（App）「We-Connect」相同，呢個App能夠遙距操控震動自慰器，真係出師不利。
林鄭喺造勢大會上解釋，選擇此口號係因為近年社會出現撕裂，缺少和諧，社會停滯不前，希望能再次團結，同行向前，所以包括佢在內嘅競選團隊都着上印有「We Connect」嘅藍色競選T恤。
不過口號曝光後引起網民熱烈討論，事關We-Connect係一個情趣App，情侶可透過手機遙控操作震動自慰器，此App仲有聊天、語音及視頻功能，可以透過屏幕控制自慰器震動或強度，故情侶即使分隔兩地亦可享魚水之歡。
除此之外，林鄭尋日喺一班年輕人陪同下進場時，右腳隻鞋不慎飛脫，要急急着番，未開波就甩鞋，認真「甩轆」。
