政情：零食店遭爆竊 黃偉鴻：好兆頭
過年期間香港發生幾宗大膽賊匪爆竊案，中華廠商聯合會食品製造業委員會主席黃偉鴻（Ellis）旗下嘅零食店「阿美橫丁」，大年初四被電閘黨連環爆竊。Ellis笑笑口話，新年流流就被賊人「開年」，真係大吉利是，好彩警方好快就捉拿到賊匪，仲搵番所有失物，只係虛驚一場，所以佢當係好兆頭喎！
Ellis話，年初四一早就收到員工電話，話旗下兩間零食店被爆竊，佢心諗唔通今年要行衰運？擾攘咗成日，好彩所有失物都搵番，最大嘅損失係壞咗鐵閘鎖啫！難怪佢話要逆向思考，今次事件令傳媒廣泛報道，咪當宣傳囉！
喺內地開環保電鍍廠嘅廠商會會董吳國安就話，過去兩年生意難做，因為內地成本日益高漲，好多外國訂單已轉移到柬埔寨、越南等地。今年佢將改變策略，多啲同柬埔寨業界合作，希望今年生意有好轉喇！