政情：開爐嗌休會提名無厘頭 無定向拉布泛民小學雞
尋日係大年初七，立法會議員放完新年假「開爐」，分別舉行工務小組委員會同內務委員會會議。不過，新正頭一開始，民主派議員不但未有改變拉布惡習，反而變本加厲，先喺工務小組提出休會動議失敗，再喺內務委員會選出調查梁振英收取澳洲集團UGL五千萬款項嘅專責委員會成員期間「玩嘢」，無意義咁不斷提名建制派議員，猶如「無定向」拉布，浪費寶貴嘅會議時間。
雞年伊始，立法會拉布歪風不減。積壓大量工程項目未審批，必須加多幾次會議嘅工務小組尋日開會，審議涉及九千幾個小型同前期工程嘅基本工程儲備基金合併撥款，當個會開咗大約半個鐘，建築界議員姚松炎就喺「雞蛋裏挑骨頭」，話九千幾項工程之中，民主派對二十六項有爭議，要求先抽起爭議項目，跟住又提出休會動議，新一年即發動布拉戰。
累上屆項目無落實仲卸責
上屆泛民頻頻拉布，導致多項民生政策及工程項目無法落實，點知香港眾志羅冠聰竟然將責任推畀政府同工務小組主席盧偉國，話對方「明知會塞住晒」，都唔接姚松炎嘅建議，批評對方係想將民主派污名化。不過，休會動議最終以十八票贊成、二十二票反對不獲通過，而會議最終亦能夠順利完成。
長毛唔記得劉業強個名
至於內務委員會就更加無厘頭。內會尋日進行提名議員加入調查UGL事件嘅專責委員會，議員梁國雄（長毛）喺尾段「玩嘢」，不斷提名建制派如陸頌雄、麥美娟、林健鋒同盧偉國，又指住劉業強話「姓劉嗰個……唔記得佢名」，要職員提醒，結果被長毛提名嘅建制派議員全部拒絕加入。
查實調查UGL事件對民主派來講，應該愈快開愈好，但係長毛不知所謂玩嘢嘥時間，為拉布而拉布，毫無方向目的，連觀測風向嘅風向雞都被吹脹，真係無聊過小學雞。該專責小組委員會最後選出十一名議員，謝偉俊及周浩鼎分別出任正、副主席。