中環出更：麻雀高手莊成鑫 贏錢請食飯
過年時唔少人會同親戚拜年閒談之餘，亦會打麻雀聯誼一下。中華出入口商會（中出）榮譽會長莊成鑫就係麻雀高手，早前佢出席中出就職禮時自爆，舊年同一班親戚聚埋一齊打麻雀，佢成為大贏家，佢冇講贏咗幾多，只係話贏咗之後請食飯，結果埋咗單後仲有剩，咁聽落真係贏咗唔少喎！而且新年「有餘」，真係夠晒好意頭。
過年除咗打麻雀，仲有唔少習俗要跟住做。莊成鑫係潮州人，每年都有接財神等習慣，不過佢嘅下一代都唔識呢啲習俗，又唔係好想學，所以都係靠佢堅持繼續做。佢笑笑口話唔介意，最緊要全家人一齊開心過年。
許華傑自嘲毛筆字醜
中出副會長許華傑每年過年必做嘅事就係寫揮春，笑指自己字醜，唔見得人，而且因為一年先寫一次，呢個年代大家又習慣打字，所以啲毛筆字咁多年都冇進步過。寫完要將啲字剪出嚟，但係寫喺宣紙上又剪得唔整齊，各人指住大家啲揮春取笑下，都幾開心。許華傑又話做生意為咗好意頭，一定會用金漆寫，仲一定會寫「貨如輪轉」添！
講起生意，裕華國貨董事長余國春話，過年最賣得嘅梗係過年食品，近年旗袍亦愈來愈好賣，因為着旗袍去拜年都好得體。不過傳統旗袍好顯身材，都幾蝦人着，余國春就話近年旗袍都加入咗新設計，唔少人都着得好好睇。
同場嘅立法會議員葛珮帆平時忙到飛起，過年都只得年初一可以陪家人，所以預定七月份全家坐郵輪旅行，陪吓媽媽都好。
卓妮