我有正能量：義工拜早年 安老送暖
臨近農曆新年，獨居長者亦未必要孤苦伶仃，一群年輕義工早前逐家逐戶登門拜早年，令一眾長者暖在心。義工貼心地送上賀年禮物，更為長者帶來心靈上的支持和關懷，為獨居生活帶來暖笠笠的祝福。
「又係你哋呀，好耐冇見啦！」居於長沙灣麗閣邨的文姑，甫見到「頤樂行動」義工隊的Stephanie和阿曼登門拜訪，喜悅之情頓時表露無遺。二人甫進室內，就像好友般「細聲講大聲笑 」，期間，文姑向兩人查詢如何使用手機拍照，三人即興大玩「自拍」，又不時分享全家福。
年花食物 添節日氣氛
「每逢大時大節，我哋都會準備唔同嘅應節食品，例如冬菇、木耳等，為佢哋沖喜吓。」 Stephanie和阿曼表示，臨近農曆新年，義工特意購買劍蘭等年花送予長者，「希望帶畀佢哋多啲新年氣氛，多啲朝氣！」義工每兩個月就帶同食物、衣物和日用品等探訪獨居長者，不但物質上的援助，義工噓寒問暖，更令長者暖在心頭。
另一名受助長者何姑對禮物讚不絕口，「啲花開得好靚，啲冬菇又好新鮮，你哋真係好有心！」她的家人大多已移居外地，加上行動不便，令何姑甚少出門活動，「好在不時會有義工過嚟探吓我哋，又同我哋傾吓心事，等我哋冇咁悶！」
配對義工長者 建互信
「同大多只做一次性探訪嘅義工服務唔同，我哋會為義工同長者進行配對，希望雙方建立長期嘅互信關係。」由一群義工自發組成的「頤樂行動」，自一○年起探訪獨居長者，服務範圍包括長沙灣及深水埗等，至今已有超過一百名長者受惠。該組織統籌邱俊誠表示，透過配對義工與長者，為受助長者提供更穩定及持久的生活和心理支援。
「早前有位九十歲嘅婆婆，因為要照顧不良於行嘅大仔，日子過得好辛苦，我哋透過同婆婆配對嘅義工得知佢哋嘅苦況後，送咗一部二手電動輪椅畀佢哋，希望可以減輕婆婆負擔。」義工經常性探訪，更貼心明白長者需要，邱期望，未來能夠有更多年輕人加入義工行列，以體現「施比受更有福」的精神，「多啲關懷，多啲行動，世界自然更溫暖！」
圖：吳康琦
文：李耀宗