政情：楊德強紮行馬 揈「戰繩」無失禮
上任差唔多一年嘅體育專員楊德強前日同多名立法會民政事務委員會委員一齊參觀香港體育學院，期間楊德強突然技癢，喺一眾運動員同議員前揈「戰繩」。有冇獻醜先？咁又冇，揈得好有力添！
楊德強事後分享經驗時話，揈戰繩嘅秘訣並唔係靠手力，而係要「馬步穩」，同場亦有「年輕議員」因為馬步紮唔穩，所以畀條戰繩牽制住，至於嗰個年輕議員係邊個呢？佢就冇透露喇！
佢話自己後生嗰陣都係一個運動員，擔任體育專員之後都仲會抽時間打壁球，仲要一星期打三晚，一晚練習、兩晚比賽，工作咁繁忙都仲擠到時間做運動，真係唔簡單！佢又話正因為自己係用家，制訂體育政策嘅時候都會盡量做得貼地一啲，多啲考慮運動員嘅需要喎。