政情：立法會終獲「正名」
港英政府一八四三年喺香港成立立法局，本港回歸後立法會取代立法局成為香港立法機關。然而回歸至今近廿年，立法會《議事規則》條文中仍使用「立法局」字眼。立法會尋日終於通過決議案，為立法會「正名」。不過，現時仍有部分喺回歸前已沿用嘅法例至今仍未更改字眼，唔知道律政司幾時先會作出更正呢？
立法會尋日喺不記名投票下通過根據《基本法》第七十五條動議嘅擬議決議案，對《議事規則》作出多項修訂，包括將條文中「《立法局（權力及特權）條例》 」嘅字眼廢除，改為「《立法會（權力及特權）條例》」、把條文中「鑑於」嘅「鑑」改為「鑒」等。
謝偉俊籲勿破壞《議事規則》
立法會議事規則委員會主席謝偉俊喺會上就決議案發言時話，今次《議事規則》嘅修訂只屬輕微、技術性，以及過咗時、應該一早做嘅修訂，而過往委員會很多工作都「得個做、冇結果」，希望今次係一個「開步」，以後能有更多與時並進、積極有為嘅修訂，將已過時嘅條文作出適當修改。
佢亦希望能夠「先易後難」，日後需修改《議事規則》時，唔會因怕得唔到支持而唔提出，同時又呼籲議員要尊重《議事規則》，唔好肆意破壞，並喺需要時適當執行《議事規則》。