政情：吳得掂等Out 晒「政績」吸嬲
無論邊個做下屆特首都好，被戲謔為「吳得掂」嘅教育局局長吳克儉民望長期包尾、上任時又風波不斷，都幾可肯定係無得留低。尋日施政報告發表前夕，吳得掂突然喺facebook（fb）一連發布十個貼文，講述上任以嚟嘅多項政績，就連搞唔成嘅中史科同被鬧爆嘅生涯規劃都包括在內，唔知佢係為自己埋單計數，定係為未來搵工鋪定後路呢？但有政界人士就嘲諷佢，話佢任內外訪次數咁多，不如寫下外訪見聞可能仲受歡迎喇！
外遊局長任內屢被鬧爆
吳得掂一向係最惹火嘅問責局長，一上任就鬧出國民教育風波，之前小三全港性系統評估（TSA）又不斷備受批評，亦曾因為缺席TSA公聽會而被鬧爆，事後佢自爆去咗日本睇紅葉，再加上任內經常外訪，被批評係外遊局長，點知佢仲晒命，話自己外訪仲辛苦過喺香港裏面嘅時間。
之不過，吳得掂似乎唔認同外間對佢嘅批評，反而自我感覺良好。佢尋日就喺特首發表施政報告前一小時，喺個人fb上一連貼出十篇文，話「施政報告出爐之前，看看香港過去數年的教育發展」，內容包括科技教育、高等教育、生涯規劃、多元學習需要等多個範疇，講述由佢上任至今政策上嘅改變。
貼文隻字不提政策爭議
喺呢啲貼文當中，佢好似數白欖咁講自己政績，例如香港有五間大學躋身在二○一六年泰晤士高等教育世界大學排名榜前二百名，又話將中史成為初中必修學習領域，但就隻字都唔提當中嘅爭議。
吳得掂嘅貼文完全係隱惡揚善，當然唔會得到大眾認同喇，十個貼文中讚好嘅人寥寥可數，更有人畀「嬲嬲」。有政界人士亦嘲諷吳得掂，指佢任內外訪次數咁多，不如寫下外訪見聞可能仲受歡迎。其實無論邊個做下屆特首，吳得掂都預咗無得留低，餘下任期仲積極推銷自己，真係唔知博咩囉？